Executive日記——警隊慈善音樂會籌380萬

頭條日報        21/4/2016


天王黎明於十九日登台獻唱，為慈善出一分力。
Kelly呢兩晚好忙，去咗支持警察同公益金。警務處聯同公益金前日起一連兩晚舉行「樂韻警聲為公益2016」慈善音樂會，繼前晚請嚟「金句王」黎明獻唱，昨晚就有李克勤高歌，結果籌得三百八十萬元善款，資助「特殊教育需要兒童服務」，好有意義。

       呢個別開生面嘅慈善音樂會，係慶祝香港警察學院成立十周年及香港警察樂隊成立六十五周年，有多個表演單位登場，包括警察樂隊、著名薩克管演奏家、中樂團敲擊樂家等等，小妹好like，當然仲有帶全場氣氛嘅天王黎明、李克勤，全場拍爛手掌呀。

善款捐公益金

　　唔少退役警員嚟撐場，有退役二十年嘅警員同Kelly講，覺得音樂會最特別嘅，喺聽到警察樂隊奏樂，因為係學警畢業時先會聽到，平時都冇咩機會㗎，令佢諗返起昔日學堂嘅日子喎，好有親切感咁話！